Paikallisuutiset

Sámemusea Siidda ovddasteaddjiguoktá dásseválddi presideantta iehčanasvuođadoaluide

Sámemusea Siiddas leat dál vuosttas háve bovdejuvvon ovddasteaddjit Suoma dásseválddi presideantta iehčanasvuođadoaluide. Sámemusea ovddasteaddjin doaluin leaba museahoavda, doaibmajođiheaddji Taina Máret Pieski ja sámemuseavuođđudusa stivrra ságadoalli Veikko Feodoroff. Mii leat hui movttegat, go presideanta Alexander Stubb háliidii oahpásmuvvat Sámemusea ja luondduguovddáš Siidii ja sámi kulturárbái go galledii Anára miessemánus.

Sámemusea Siida bálkkašuvvui dán jagi Eurohpá museasuorggi buot eanemus árvvusadnojuvvon bálkkašumiin, musea faskii Jagi eurohpálaš musea -bálkkašumi (EMYA2024). Bálkkašupmi geigejuvvui dál vuosttas háve museai mii doaibmá Suomas. Sámemusea ja luondduguovddáš Siida válljejuvvui dán jagi maid Jagi musean Suomas.

Goappáge bálkkašumi duohkin leat dat, ahte Siidda doaimmain lea váikkuhus servodahkii ja Siida lea bargan ovttas sámeservošiin. Siida lea maid dállun aiddobáliid ođaduvvon ja Suoma álbmotmusea lea máhcahan viiddis sámedávviriid čoakkáldaga sámiide.

Siidda ođđa váldočájáhusas Enâmeh láá mii párnááh sámit muitalit vuosttas háve ieža iežaset birra, iežaset muitalusa.

– Válmmaštalaimet ovttas sámeservošiin čájáhusa, mii muitala sámekultuvrra birra. Čájáhusa ja Suoma álbmotmuseas máhcahuvvon dávviriid válmmaštallamii válde oasi badjel 300 sápmelačča. Nuba dát bálkkašumit gulletge olles sámeservošii, dadjá museahoavda Taina Máret Pieski.

– Dán jagi iehčanasvuođabeaidoaluid Ovttas-temá guoskkaha min earenoamáš bures ja lea gudni oažžut ávvudit Suoma iehčanasvuođa áiddo dán jagi dásseválddi presideantta ja su eamida bovdejuvvon guossin, dadjá sámemuseavuođđudusa stivrra ságadoalli Veikko Feodoroff.